Entre o cabo de semana d’os días 11,12 y 13 de marzo transcorrió entre l’Ateneo Libertario de Villaverde y o Centro Sociocultural Ágata (Madrit) o primer congreso d’a Federación Estudiantil Libertaria, dimpués d’haber-se realizau en chulio de 2014 o Congreso fundacional d’a mesma, an distintos colectivos decidioron organizar-se en común arredol d’una Federación.
O Congreso ha serviu como espacio de debat entre a militancia, ya que s’han analisau as diferents realidatz locals con l’obchectivo de formar una visión global de las luitas en as qualas participan as agrupacions d’a FEL. A partir d’ista analís s’estableix un debat arredol de cómo afrontar a realidat dende una perspectiva revolucionaria, qué accions prener hue pa fer camín enta una sociedat de personas libres y iguals, con o mundo de l’amostranza como un meyo indispensable pa transitar ent’os nuestros anhelos de libertat. Fruito d’istos debatz s’actualiza y s’estableix a Linia Cheneral d’Actuación d’a Federación, as propuestas estratechicas que desembolicarán as agrupacions en o suyo ambito. A estratechia colectiva que sustenta o prochecto politico d’a FEL, revalidando o nuestro compromiso por una educación universal, gratuita y critica, fomentando las luitas dende un movimiento estudiantil autonomo y combativo y con a Chestión Comunitaria como ideya forza en o meyo plazo.
Amás de qüestions relacionadas con la luita cutiana, o Congreso tamién sirve pa actualizar y adaptar a estructura d’a Federación a las necesidatz d’o momento. D’ista traza, as agrupacions han achugau por fortalecer a organización, sin deixar de costau l’acción local. Trobar l’equilibrio entre a estructura federal y o treballo local ha estau un d’os grans eixes de debat.
Ista trobada tamién ha resultau fundamental pa estreitar lazos entre a militancia d’a Federación. Una militancia cambiant a causa d’o caracter ciclico de l’estudiant, pero una militancia renovada y compromesa con un prochecto común. Se fació patent a importancia dada a ixa cohesión entre companyeras, a o cudiau y emparo mutuo de puertas pa adintro, fundamental pa poder levar a cabo una militancia sana, an as distintas sensibilidatz puedan sentir-se comodas y integradas.
No podemos ixuplidar-nos d’agradeixer enormement o suyo treballo a l’agrupación de Villaverde d’a FEL, que cargoron con gran parte d’o peso organizativo por fer d’anfitrions, a la CNT Comarcal Sud por reblar-nos o suyo espacio y tramitar-nos a solicitut d’o Centro Sociocultural Ágata, an tenió puesto parte d’o Congreso, y a o propio Centro Sociocultural por o espacio y 
dar-nos todas as facilidatz. Tamién agradeixer l’emparo recibiu dende atras organizacions como Embat, Ikasle Abertzaleak, Sindicat d’Estudiants dels Països Catalans u a Federación Anarquista de Gran Canaria.
Con tot ixo asumimos con argüello y goyo o quefer que nos hemos imposau: a construcción d’una ensinyanza que nos aduye a transformar radicalment a sociedat, no a perpetuar-la.
Villaverde, Marzo de 2016.
Entalto as que luitan!