Vaca: “Interrupción colectiva de l’actividat laboral d’a man d’os treballadors con a fin de reivindicar ciertas condicions u manifestar una protesta”
En l’ambito estudiantil ista definición no s’asemella a la realidat d’os zaguers anyos, no nomás porque en ellas tasament i participen treballadoras, si no porque no engalzan a consecución d’uns obchectivos reals y alcanzables.
Todas hemos sentiu en buena cosa d’ocasions a lo largo d’os zaguers cursos a parola “vaca estudiantil”, y pa arrienda chent lo que ha significau ye un día de descanso, en o millor d’os casos un día de manifestación contra tal lei u tal reforma; asumindo, con tot y con ixo, que ixa reforma u lei iba a estar aplicada, porque, a lo cabo y a la fin as nuestras fuerzas colectivas no adubiban.
Pero ye fesable aconseguir cosas? Fan honra pa cosa as vacas?
Dende a FEL entendemos a vaca como una ferramienta de presión que cal que faga honra pa aconseguir obchectivos sinyalaus por o movimiento. Uns obchectivos de caracter inmediato, pero tamién ligaus a demandas de gran fundo.
A pregunta clau ye, qué podemos aconseguir?, y siguient pregunta, qué cal que fagamos? No nos fa goyo lo 3+2, tampoco a LOMCE, ni a LOE, pero entendemos que no contamos con a capacidat d’aturar ixas midas con una “simple” vaca d’estudiants. Levamos anyos de fracasos luitando contra diferents leis y midas, fendo bofo lo concepto de vaca, cremando a la chent y contrimostrando una falsa inutilidat d’a luita y a movilización.
Viyemos como lo “Sindicato de Estudiantes” sigue convocando sin tron ni son y viyemos como surten organizacions que tractan de substituyir-lo actuando d’a mesma forma: Convocando dende alto sin garra respeto por todas as estudiants organizadas y movilizadas en as suyas asociacions, colectivos y asembleas. Convocando “vacas” como pur reclamo publicitario d’unas siglas.
Dende a FEL somos conscients d’a situación an que nos trobamos, inestabilidat politica, tensions territorials, una achenda neoliberal imposando-se y uns movimientos socials que han sufriu fuertes baixas por a confianza depositada en as institucions estatals. Toda protesta contra o Rechimen contará con as nuestras simpatías, manimenos no podemos acceptar as formas en as que se nos presientan as propuestas estudiantils. Creyemos en as movilizacions que promanan d’as necesidatz colectivas d’o movimiento, d’a organización de base en asembleas y asociacions, en garra caso d’imposicions dende alto sin garra tipo de dialogo previo.
Como FEL proposamos fomentar istas formas organizativas, planteyar tablas reivindicativas materializables y a traviés de tot un ventallo d’accions (vacas, impagamientos, boicot, manifestacions…) luitar por ellas de forma colectiva, chunto con toda la comunidat educativa, con a fin d’acumular fuerzas y contrimostrar que l’acción y movilización son utils. Constituindo dende as luitas estructuras conscients que nos permitan abanzar posicions enta transformacions socials de fundo y fendo d’istas luitas un afer d’orden publico.
Encara asinas, somos chent conoixedera d’a existencia de diferents realidatz territorials en o conchunto de l’Estau espanyol, con territorios como Catalunya an que a vaca se planteya dende perspectivas diferents a las arribistas d’a convocatoria estatal. Queremos amostrar asinas o nuestro emparo y solidaridat a la convocatoria alternativa d’o SEPC y a FEA
En tot isto treballamos dende a “Federación Estudiantil Libertaria”
Enta una educación franca y universal baixo control comunitario.
Entalto as que luitan!